Kea a 'jeɛ 'blʋa ‑jeopoʋn 'a 'pee
82
Asafʋ 'a 'dʋ.
'De Kea 'a 'peeje na' a,
Kea sɔn 'ʋn 'ɛ 'de ‑kɩɩ' "klu ‑wɛe ɛɛ 'wlʋ 'pee.
2 Nɔ" ‑jɛɛ 'di ao 'je nyʋ ‑ʋʋa nʋʋdɩ
nynia "jrii 'a o 'wlʋ ‑tɩ "itaiɛ‑,
‑wɛe ao 'ble 'diwɔnyniiʋn 'a ‑gba? ‑Te' ‑kwlʋ.
3 Ao 'ble wɛenyɔ ke "kwieju 'a ‑gba,
ao nʋ "isrɛdɩ 'de nɩa" nyɔ ke wɛenyɔ ‑pee.
4 Ao ‑seie nɩa" nyɔ ke wɛenyʋ ke 'de 'diwɔnyniʋn 'kwa.
5 'Kaa, ʋʋ se dɛjrɛ' juuo‑, ʋʋa 'wɔn dɛ 'mii,
ʋʋ nɩɛ 'de kwie 'di, ‑bo ʋʋa sea na a ʋʋa ‑see',
'de ɛɛ' ‑tɩ' 'ʋn 'blʋa ‑wee' dooa'.
6 'Ɩn 'tmʋʋɛ sese, ao nɩɛ ‑kɩɩ' ‑o,
kɩɩn ao ‑wee'‑ "klein nɩɛ Kea ‑nɩa 'e dɩ ‑wee'‑ "klein "jrukpɔ' 'ɔ "nynuu ‑o.
7 'De ‑mɛ aoa muɛ 'mɛɛa' ka nyʋ ‑wee'‑ a 'mɛa',
aoa muɛ blua' ka Tʋ "bo 'a "nynuu a blua.
8 ‑Ɩn ‑sɔn 'ʋn ‑ɩn ‑je 'blʋa ‑nɛ 'ɛ 'pee 'je 'oo Kea,
dɛ ‑nʋɛ ‑mɔ ‑nɩ 'blʋa ‑nɛ 'ɛ jei.